Akademie

'n Akademie (Attiese Grieks: Ἀκαδήμεια; Koine Grieks: Ἀκαδημία) is 'n instelling vir sekondêre of hoër onderwys, navorsing of erelidmaatskap. Die verwante term akademia verwys na die globale leerkrag van professore en navorsers in institusies vir hoër onderwys. Sogenaamde akademiese vryheid word gesien as 'n grondslag vir intellektuele omgewings, waarbinne die reg om kennis na te strewe, rede te voer, te onderrig en navorsing te doen, beskerming geniet van inmenging deur enige owerhede of sensuur.^[1]

Die naam kan teruggevoer word na Plato se skool vir filosofie wat hy om en by 385 v.C. te Akademia gestig het. Laasgenoemde was 'n heiligdom van Athena, die godin van wysheid en vaardigheid, wat noord van Athene in Griekeland geleë was. 'n Akademie in sy klassieke vorm is dan 'n plek van intellektuele besinning en werksaamhede en vir die waardering en bevordering van skeppende werk.^[2] Die Platoniese Akademie is waarskynlik tydens die beleg van Sulla in 86 v.C. vernietig,^[3] en 'n Akademie sou eers weer in die 5de eeu herrys.

In die moderne wêreld word die woord akademie vryelik toegepas in leerskole in sport, fotografie, modelwerk, skoonheidsalonne, ensomeer,^[2] wat gevolglik nie die oorspronklike betekenis gestand doen nie.

1. ↑ Venter, Albert; Botha, Susan; du Plessis, Louis; Alberts, Marietta (2017). Explanatory dictionary of politics / Verklarende politieke woordeboek. Kaapstad: Juta and Company. p. 1. ISBN 9781485119944.
2. ↑ ^{2,0 2,1} Kapp, Pieter (Desember 2011). "Tydskrif vir Geesteswetenskappe". Tydskrif vir Geesteswetenskappe. 51 (4). Besoek op 19 Julie 2018.
3. ↑ Lindberg, David C. (2007). The Beginnings of Western Science. University of Chicago Press. p. 70. ISBN 9780226482057.